Ljóð Jóhannesar í bundnu máli virðast falla einstaklega vel að tónlistarsköpun og því ekki að undra hvað mörg tónskáld og tónlistarmenn hafa leitað í smiðju Jóhannesar í gegnum tíðina.
Kliðmjúk væri kannski rétta orðið til að lýsa samruna ljóða hans við tónlist, því það er á stundum eins og þau séu ort til að við þau sé samið lag.

Ljóð Jóhannesar eru auk þess á margan hátt samofin tónlistarsögu okkar Íslendinga. Um jólahátíðina má heyra Bráðum koma blessuð jólin, vísurnar um Jólasveinana eða Jólaköttinn. Og Íslendingaljóðið — Land míns föður, við lag Þórarins Guðmundssonar, hljómar í ýmsum útsetningum við ýmis tækifæri, ár eftir ár.