Þegar breska herstjórnin lét flytja Einar Olgeirsson ritstjóra Þjóðviljans, 4. þingmann Reykvíkinga, til Englands, tók varamaður hans, Jóhannes úr Kötlum, sæti á þingi. Í umræðum um þegnskylduvinnu var Jóhannes meðal andmælenda, og kom fyrir í máli hans orðið taxtakaup. Kvað þá Bjarni Ásgeirsson til hans vísu:

Teygað hefir þorstlát þjóð
af þínu boðnar-staupi.
Ortir þú samt öll þín ljóð
undir taxtakaupi.

Jóhannes svaraði þá með eftirfarandi vísu:

Taxtakaupið tíðum brást
tregu ljóðsins barni,
en ef það skyldi eitt sinn fást,
yrði ég þægur Bjarni.

_{(Heimild: Þingvísur 1872-1942, útg. 1943; Jóhannes úr Kötlum safnaði)}