Jólasýning Landsbókasafns

Jólasýning Landsbókasafns Íslands – Háskólabókasafns var opnuð nú í byrjun desember en tilefni sýningarinnar er 80 ára útgáfuafmæli kvæðakversins Jólin koma eftir Jóhannes úr Kötlum.

Kínaför 1952

Haustið 1952 fór íslensk sendinefnd í fyrsta sinn til Kínverska alþýðulýðveldisins sem hafði verið stofnað aðeins fáeinum árum áður eða árið 1949. Jóhannes úr Kötlum var formaður þessarar nefndar, en með honum fóru Þórbergur Þórðarson, Ísleifur Högnason, Nanna Ólafsdóttir, Skúli Þórðarson og Zóphonías Jónsson.
Á myndinni eru til vinstri Þórbergur og Jóhannes en yst hægra megin standa Ísleifur og Litla Ló, en svo kallaði Þórbergur túlk sendinefndarinnar.

Margs konar geðþekk vitleysa

„Þegar ég var barn að aldri, var hann til þess fenginn að troða inn í mig einhvers konar undirstöðuatriðum menntunarinnar. Þetta gekk ekki mjög vel og varð okkur báðum til sárra leiðinda. En þá voru að öðru leyti skemmtilegir tímar í Dölum vestur og skemmtilegt fólk, sem lifði lífi sínu í löngum, söngrænum draumi, slungnum ástsjúkri dulúð, yndislegu framhjáhaldi og margs konar geðþekkri vitleysu.“
Þannig kemst Steinn Steinarr að orði í afmælisgrein í Þjóðviljanum í tilefni af fimmtugsafmæli læriföður síns. Afmælisgrein Steins og minningarorð Jóhannesar um Stein árið 1958 má lesa hér: Jóhannes og Steinn Steinarr.

Ljóðaúrval á metsölulistum

Bókin Ljóðaúrval, nýtt safn ljóða Jóhannesar úr Kötlum, sem gefin var út af Forlaginu/Mál og menningu, hefur selst vel undanfarnar vikur. Bókin er nú í þriðja sæti á lista yfir mest seldu bækur Forlagsins og  á metsölulista Eymundsson hefur hún hertekið sjötta sætið. Þetta verður að teljast góður árangur fyrir ljóðabók og vonandi merki um aukinn áhuga yngri kynslóða á Jóhannesi.