Ljóð Jóhannesar úr Kötlum eru á margan hátt samofin tónlistarsögu okkar Íslendinga. Um jólahátíðina má heyra Bráðum koma blessuð jólin, vísurnar um Jólasveinana eða Jólaköttinn. Og Íslendingaljóðið – Land míns föður, við lag Þórarins Guðmundssonar, hljómar í ýmsum útsetningum við ýmis tækifæri, ár eftir ár.
Sóleyjarkvæði
Hið mikla söguljóð Sóleyjarkvæði, sem kom út árið 1952, endurspeglar baráttu Jóhannesar fyrir herlausu Íslandi, fyrir friði og sjálfstæði þjóðarinnar. Við tónlist Péturs Pálsonar hefur Sóleyjarkvæði verið gefið út fjórum sinnum, fyrst árið 1967 og síðan endurútgefið 1973 og 2001. Háskólakórinn tók verkið að auki til meðferðar undir stjórn Árna Harðarsonar, flutti það á tónleikum og gaf það út á plötu árið 1985.
Valgeir Guðjónsson
Eftir Valgeir Guðjónsson liggja tvær hljómplötur með tónlist við ljóð Jóhannesar, Fugl dagsins (1985) og Fuglar tímans (2003) þar sem Diddú syngur lög Valgeirs.
Halldór Kristinsson
Halldór Kristinsson er einna þekktastur fyrir veru sína í söngflokknum Þrjú á Palli. Halldór sendi frá sér plötu með eigin lögum við hin kunnu barnaljóð Jóhannesar úr Kötlum úr bók hans Vísur um Ingu Dóru, en Jóhannes úr Kötlum var frændi Halldórs. Lög Halldórs hafa verið vinsæl og skotið upp kollinum á ýmsum safnplötum fyrir börn fram til dagsins í dag
Bergþóra Árnadóttir 1948–2007
Vísna- og söngvaskáldið Bergþóra Árnadóttir var einn af frumkvöðlum vísnatónlistar á Íslandi og lengi vel atkvæðamesta konan í hópi söngvaskálda. Bergþóra samdi gjarna lög við ljóð þekktra skálda, þar á meðal Jóhannesar.
Fjölmörg tónskáld og tónlistarmenn hafa samið og útsett lög og tónverk við ljóð Jóhannesar í gegnum tíðina. Má þar nefna Atla Heimi Sveinsson, Sigvalda Kaldalóns, Jón Ásgeirsson, Sigursvein D. Kristinsson, Oliver Kentish, Karl O. Runólfsson, Pál P. Pálsson og Hjálmar H. Ragnarsson. Hér að neðan má skoða og hlusta á nokkur dæmi um tónlist við ljóð skáldsins.
